नरहरी झिरवळ आणि राहुल नार्वेकर प्रकरण: मंत्रीच्या दालनात लाच, शेतकऱ्यांच्या जागेत घुसखोरी; महाराष्ट्रात सत्ता आणि भ्रष्टाचाराची धडक
रायगड – अमुलकुमार जैन
महाराष्ट्रातील राजकारणातील सत्ता आणि भ्रष्टाचाराच्या छायेत एक धक्कादायक प्रकरण समोर आले आहे. अन्न व औषध प्रशासन मंत्री नरहरी झिरवळ आणि विधानसभा अध्यक्ष राहुल नार्वेकर यांच्या कारवाया राज्यातील प्रशासन आणि संवैधानिक पदांच्या प्रतिष्ठेवर मोठा प्रश्न उपस्थित करत आहेत.
माहितीप्रमाणे, नार्वेकर यांनी अलिबाग तालुक्यातील म्हात्रोळी गावातील शेतकऱ्यांच्या जमिनीवर घुसखोरी करून सरकारी अधिकाऱ्यांसह मोजणी सुरू केली. शेतकरी कुटुंब विरोध दर्शविल्यास, ते लोक दाबून धुमाकूळ घालत गेले. व्हिडीओमध्ये स्पष्ट दिसते की, विधानसभा अध्यक्षपदावर बसलेल्या नार्वेकरांनी शिष्टाचार विसरून स्वतःच्या फायद्यासाठी कायद्याचा खुला उपहास केला. या प्रकारामुळे स्थानिक शेतकरी आणि नागरिकांमध्ये भीतीचे वातावरण निर्माण झाले आहे.
याच दरम्यान, मंत्री झिरवळ यांच्या दालनात लाच घेण्याचा प्रकार उजेडात आला. झिरवळ यांचे पीए रामदास गाडे यांच्या सांगण्यावर लिपिक राजेंद्र ढेरंगे यांनी लाच स्वीकारली, ज्याची पोलिसांनी रंगेहाथ पकड घेतली. ही कारवाई मंत्री झिरवळांच्या दालनातच घडली, त्यामुळे प्रकरण अधिक गंभीर बनले आहे. सूत्रांनी सांगितल्याप्रमाणे, झिरवळ सध्या काही दिवसांपासून गायब आहेत आणि त्यांचा फोन बंद आहे, यामुळे राज्यातील प्रशासनावर प्रश्नचिन्ह निर्माण झाले आहे.
केमिस्ट अॅण्ड ड्रगिस्ट असोसिएशनचे सचिव अनिल नावंदर यांनी या प्रकरणाची तीव्र टीका केली असून, राज्यातील भ्रष्टाचार, लाचलुचपत आणि प्रशासनातील दगाबाजीत मुख्यमंत्री देवेंद्र फडणवीस यांच्यावरही जबाबदारी असल्याचे म्हटले आहे. मंत्रालयातील भ्रष्टाचार, शेतकऱ्यांच्या जमिनींचा गैरवापर आणि संवैधानिक पदांचा खुला दुरुपयोग यामुळे राज्याची प्रतिष्ठा धुळीस गेली आहे.
झिरवळ-नार्वेकर प्रकरण फक्त व्यक्तिगत गैरवर्तन नाही, तर प्रशासनाच्या नियंत्रण, न्यायव्यवस्था आणि संवैधानिक जबाबदाऱ्यांवर धोकादायक छाया टाकणारे आहे. रायगड, रत्नागिरी, सिंधुदुर्ग या कोकण पट्ट्यावर गुजरातमधील बिल्डरांचे राज्य निर्माण करण्यासाठी जमीन व्यवहारातील गैरवापर करण्याची कारवाईही या प्रकरणाचा भाग असल्याचे सूत्रांनी सांगितले.
या घटनेमुळे राज्यातील सत्ता आणि प्रशासनावर नागरिकांचा विश्वास धोक्यात आला असून, मुख्यमंत्री फडणवीस यांनी या गंभीर घटनेकडे गांभीर्याने पाहणे आणि दोषींवर योग्य कारवाई करणे आवश्यक आहे. झिरवळ आणि नार्वेकर यांच्या कारनाम्यांमुळे महाराष्ट्रातील प्रशासन, संवैधानिक प्रतिष्ठा आणि स्थानिक शेतकऱ्यांच्या हिताचे प्रश्न उभे राहिले आहेत.
