रोहा-पनवेल लोकल सुरू करण्याची मागणी जोर धरतेय
हजारो प्रवाशांना होणार मोठा दिलासा; रेल्वे प्रशासनाने गांभीर्याने विचार करण्याची मागणी.
रोहा प्रतिनिधी .. महेश मोहिते.
रोहा, धाटाव, चणेरा, कोलाड, नागोठणे, पेण आदी परिसरातून दररोज पनवेल, नवी मुंबई, ठाणे आणि मुंबईच्या दिशेने प्रवास करणाऱ्या हजारो प्रवाशांच्या सोयीसाठी रोहा ते पनवेल थेट लोकल सेवा सुरू करावी, अशी मागणी आता जोर धरू लागली आहे. वाढती लोकसंख्या, औद्योगिक विकास, शिक्षण तसेच रोजगाराच्या वाढत्या संधींमुळे या मार्गावर दररोज प्रवास करणाऱ्यांची संख्या मोठ्या प्रमाणात वाढत आहे.
सध्या रोहा व परिसरातील अनेक प्रवाशांना पनवेल अथवा पुढील मुंबई-नवी मुंबई परिसरात जाण्यासाठी उपलब्ध रेल्वेसेवेवर अवलंबून राहावे लागते. त्यामुळे प्रवासाच्या वेळेचे नियोजन, गाड्यांची उपलब्धता तसेच गर्दी यामुळे प्रवाशांना अनेक अडचणींचा सामना करावा लागत असल्याचे नागरिकांचे म्हणणे आहे.
-वेळ आणि पैशांची होईल बचत-
रोहा-पनवेल थेट लोकल सेवा सुरू झाल्यास प्रवाशांचा प्रवासाचा वेळ कमी होण्याबरोबरच त्यांच्या दैनंदिन प्रवासावरील खर्चातही बचत होऊ शकते. विशेषतः नोकरी, व्यवसाय, शिक्षण आणि वैद्यकीय कारणांसाठी नियमित प्रवास करणाऱ्या नागरिकांना या सेवेचा मोठा फायदा होणार आहे. कार्यालयीन वेळेचे नियोजनही अधिक सुलभ होईल.
-वाढत्या प्रवासी संख्येच्या पार्श्वभूमीवर निर्णयाची अपेक्षा-
रोहा आणि नागोठणे परिसरात औद्योगिक तसेच नागरी विकास वेगाने होत आहे. नवीन वसाहती, उद्योग, शैक्षणिक संस्था आणि रोजगाराच्या संधी वाढत असल्याने पनवेल व नवी मुंबईकडे जाणाऱ्या प्रवाशांची संख्या दिवसेंदिवस वाढत आहे. त्यामुळे भविष्यातील प्रवासी गरजा लक्षात घेऊन रेल्वे प्रशासनाने या मागणीचा गांभीर्याने विचार करावा, अशी अपेक्षा व्यक्त होत आहे.
-प्रवाशांची सोय म्हणजे विकासाला चालना-
सुलभ आणि नियमित लोकल सेवा उपलब्ध झाल्यास प्रवाशांचा वेळ वाचण्याबरोबरच रोजगाराच्या संधींचा अधिक प्रभावीपणे लाभ घेता येईल. यामुळे रोहा, नागोठणे, पेण व परिसरातील आर्थिक आणि औद्योगिक विकासालाही चालना मिळण्याची शक्यता आहे.
रोहा ते पनवेल थेट लोकल सेवा सुरू करावी, प्रवाशांची वाढती संख्या लक्षात घेऊन तातडीने सकारात्मक निर्णय घ्यावा आणि रेल्वे प्रशासनाने या मागणीची गांभीर्याने दखल घ्यावी, अशी मागणी नागरिक व नियमित रेल्वे प्रवाशांकडून करण्यात येत आहे.ही केवळ सुविधा नसून प्रवाशांच्या दैनंदिन जीवनाशी जोडलेली गरज आहे, अशी भावना प्रवाशांमधून व्यक्त होत आहे.
रोहा-पनवेल लोकल ही काळाची गरज.
कोलाड, रोहा, नागोठणे, पेण आणि परिसरातून दररोज मोठ्या संख्येने नागरिक नोकरी, व्यवसाय, शिक्षण व इतर कामांसाठी पनवेल, नवी मुंबई आणि मुंबईच्या दिशेने प्रवास करतात. थेट लोकल सेवा उपलब्ध झाल्यास प्रवाशांचा वेळ आणि पैसा दोन्ही वाचणार आहेत. तसेच गर्दीचा त्रास कमी होऊन दैनंदिन प्रवास अधिक सुलभ होईल. वाढती प्रवासी संख्या लक्षात घेता रेल्वे प्रशासनाने रोहा-पनवेल लोकल सुरू करण्याच्या निर्णय घ्यावा.
